黑仔日

今日都唔知係咪破日, 諸事不順...

 

尋晚隻眼開始有d "gip", 今朝依然唔係好舒服, 帶咗 con 返到公司都頂唔順要換眼鏡, 係人都知我帶眼鏡個樣有幾 "du", 勁樣衰... 好彩放工個陣帶得翻 con 啫...

 

一早就唔記得帶電話... 不過是但啦! 反正都冇人搵我.

 

放工因為未夠鐘上堂,咪周圍逛囉! 逛咗粒幾鐘都唔發覺漏咗個銀包係公司, 直到我想買魚蛋食... 又要由times square 行返過去 sogo 嗰邊, sigh... 唔通我今日真係咁心神彷彿?  乜鬼野都漏晒...

 

係行返去攞 wallet 嘅途中, 有個 sales 走埋黎想俾d 野我, 佢同我講: "我俾d 野你呀! 你唔好咁唔開心啦!"

oh! my god... 人地岩岩諗緊 d 唔開心嘅野嘛! 乜我個樣真係show 晒俾人睇我好唔開心咩!  

UW Gathering

Date: Nov 4th

 

Venue: CEO Neway

 

Participants: Grace + Dennis, Edna + Wai, David + Theresa, Tony, Rex, Wilson, Me

 

 

尋晚原本諗住去 Pi, 點知個 friend 唔記得咗幫我 book 枱, 去到樓下先話冇我個名喎, 真係俾佢激死... 結果我地一行 10 人又去返我地嘅老地方 - CEO Neway 囉! 真掃興... 原本諗住去LKF 架嘛，　點知又係Karaoke... 我幾乎俾人殺死咁濟... 個個都叫我同嗰個friend 絕交喎！　sigh... 真係俾佢玩死！　

 

有新喜訊:

1) 有人就黎做爸爸... 聽說是意外...

2) 有人就黎補擺喜酒...

 

其他人就冇乜特別，話結婚嘅講咗成年都仲未定到時間，地點，人物就應該定咗啦啩...

Single 嘅繼續 Single...

Married 嘅繼續 Married

Married + kid 嘅繼續 Married + kid...

 

 

Japanese Dinner @Ise

今日"晏就" 俾個 friend 激親, 加上 long weekend 又好似冇咩節目, 心情都唔係好靚...  原本諗住 choir 完就返屋企, 後來見幾個 friend 好似等埋我食飯, 心諗都好過返屋企發毛, 結果又一仆一碌咁由佐敦過返銅鑼灣...

 

"伊勢" 係我近期發現嘅日本餐廳,據聞都開咗好耐,以前係皇室堡,依家搬咗去利舞臺, 上次同個 friend 去食 set dinner, 都好正, 今次呢個 friend 鍾意唔跟 menu 落 order, 話要考o下間餐廳嘅水準喎...

 

結果我就試咗好多新野, 不過都好好味...

見住一碟碟野係咁上﹐當堂開心返晒...

 

Tonite Menu:

1. 劍魚 + 半條秋刀魚 sashimi

2. 左口魚

3. 上面﹕沙甸魚 sushi; 下面﹕另外半條秋刀魚 sushi

4. Ikura + Uri + Tuna sushi

5. Fatty Tuna

6. 沙甸魚嘅骨

7. 劍魚同秋刀魚嘅骨

8. Wasabi 牛柳

9. 金菇炒烏冬

10. 綠茶+柚子雪糕 (No Pic)

又開始肥啦!

hehe... 冇野做, 奉旨 hea 緊﹐update 下個 blog 先...

 

唔覺唔覺﹐返咗工都成個月有多﹐就係咁﹐日日食 full lunch, 坐足7粒鐘﹐個肥美嘅脾脾同 pat pat 又開始走返出黎。著牛仔褲嘅時候﹐個脾脾位有種迫爆嘅感覺, d 肉唧晒出黎﹐好死肉酸﹐另一條褲呢﹐過 hip 位過陣有d困難, 加上有個肚腩仔... 心知不妙...

 

次次一開始肥﹐嚮警報一定係呢種迫爆牛仔褲嘅感覺。但係上磅睇﹐空肚都係 90lbs...都唔知點解會咁...  but anyway, 都係時候節制下﹐所以依家食 lunch 都會提自己﹐唔好食晒 d 野...同埋的起心肝﹐每晚臨瞓都係咁二做下sit up﹐30下先啦! 都好辛苦下﹐做到死下死下... 但係做咗兩日咁多﹐呢兩晚都唔記得咗添...   脾脾位真係好難減架...

Annual Dinner

Date  : Oct 18, 2006

Venue: 帝京酒店 (Royal Plaza)

Fee   : $320

 

尋晚去咗中學個 Annual Dinner﹐今次係咁多年黎第一次出席呢類咁嘅活動。都係個 friend push 我去﹐我先去﹐話晒今年都係我地 grad 咗之後嘅 15th Anniversary。我諗下年再去嘅時候﹐都係 call 多 d d 同班嘅同學仔去好 d。雖然我地個屆有成 30 人出席﹐但大部份都係隔離班 d 同學仔﹐認得不過唔識﹐個樣同細個時一鬼樣﹐吋到爆。

 

開始時﹐choir member suppose 要上台唱 school hymn﹐我就側側膊冇上去﹐好似好衰咁﹐下年再去都係乖乖地上去先...feel so guilty...

 

Headmistress 話學校要重建﹐要搬去深水埗唔知邊度 3 年呀! So sad...that means 好多 bldg 都會拆晒﹐以後想懷緬下都冇機會。新起個 d bldg 又鬼死咁肉酸﹐一d 特色都冇﹐好似 d 政府樓咁... 其實呢十幾年都已經拆咗好多。好似以前我地 F.1 去捉蝸牛既後花園已經變咗憧 bldg﹐ gym 又重建咗。遲d 連 swimming pool 都好似想搬上新起 bldg 既頂。Mm... 好唔捨得...

aiya... 我諗好快就會收到捐錢信!

 

每一個 year 都會上去影張相﹐最老嗰年好似係 1940 年﹐有 2 個﹐計一計兩個師姐婆婆都有 83 歲! wow.... 唔知我有冇咁長命呢!

 

Lucky Draw 冇我份。不過買咗隻 bear $100... 毛巾都係 $100﹐下次先啦! 

 

 

黃大仙

今日同個 friend 去咗黃大仙﹐求咗3枝簽﹐一枝係問轉行﹐一枝係問幾時揾到長工﹐另一枝係問姻緣。

 

首先講下工作簽先啦! 轉行個枝下下簽。Sigh.. 咁即係話冇乜機會啦! 但又話農曆11月先有機會喎﹐咁即係點呢?! 再加埋揾工個枝﹐佢話如果做返原來個 d﹐ 就農曆 9月﹐10月就有機會喎! 仲要係咩有人退休呀! 走呀! 仲要人幫呀咁! 聽到呢度都已經冇晒心機。

 

跟住到姻緣簽喎! 佢話下下簽喎! 其實都冇乜咁特別﹐皆因我十幾年黎﹐無論有拖拍同冇拖拍﹐年年都係下下簽﹐反而今年年頭俾枝上/吉嘅簽我﹐有 d 奇怪﹐心諗唔通轉運?? 原來都唔係嘅。跟住個解簽又話我應該係夏天個陣會有個架...  又話我嘅運開始弱喎! 叫我逢農曆十五去"結緣"﹐即係揾佢寫到符然後去拜﹐要連續拜3個月﹐就算你係嗰3個月內溝到仔﹐都唔可以俾佢停﹐要拜足3個月。又或者去拜下姻緣石﹐我心諗唔係咁 PK 呀! 講到我好似好可憐咁...

 

可能我個樣有 d 變﹐佢話我唔信佢﹐其實都唔係唔信佢嘅﹐我當時只係諗緊﹐eee... 3個月﹐又要限住時晨﹐咁q 麻煩!  大家都知我有幾懶架啦! 仲話要咩 11am 之後﹐1pm 之前﹐星期日﹐同周公 social 緊架麻﹐就算有心做呢樣野﹐都要諗過先啦!

 

真係奇怪﹐d 人個個都唔俾人諗下先嘅﹐人地一諗就話人地唔信佢﹐上次賣 sunglasses 嗰個又係咁﹐呢個又係咁...

 

Z610i

買咗啦! 買咗啦! 今日終於買咗新電話啦! 我咁耐都未用過摺機﹐今次終於俾我等到一部有 d 日本 feel 既摺機啦!

 

aiya.. 要同我部 S700i 講 bye bye 添﹐有 d 唔捨得佢。其實我部 S700i 都唔差架﹐係就厚咗 d, 但個 mon 就好靚﹐又大個。

 

等埋個粉紅色出咗﹐諗咗一大餐﹐最後都係決定買咗粉藍色﹐其實我覺得黑色都幾靚﹐身邊 d 人個個都話黑色靚﹐但唔知點解﹐尋日都想轉呔買黑色﹐但今日又覺得藍色靚 d...大佬話我太三心兩意﹐咁花心﹐唔怪之得冇男朋友啦!  (關咩事???)我話﹐花心有乜問題﹐如果我有咁多男朋友俾我揀﹐我又唔介意花心喎! 多 d 仲好﹐呢個唔理我﹐我揾第個陪。

 

原本諗住轉 123, 但 3 忽然有中秋節優惠﹐我係 3 嘅客仔﹐機價原本 $2980, 3 俾我 $2680﹐減$900回贈﹐再減 $150 由2G->3G。計計埋埋機價都係 $1630。$128 plan, 15 mths 約﹐總數都係平過 123, hehe.. 好彩等一陣啫﹐尋日出就貴多 $300...

 

hehe.. 靚唔靚仔呢! 唔靚都要話靚﹐我揀既! 其實功能就普普通通﹐d 人嫌佢冇收音機﹐不過我都唔聽收音機既﹐聽歌我又有 mini ipod, d 人又話佢似玩具﹐我就係鍾意佢膠﹐個feel 似日本電話。其實3G 對我黎講真係冇咩用﹐有邊個會同我玩 video call 呀! 有都冇咁既需要啦! 費事俾人知道我係邊! hehe.. 最緊要係靚仔﹐function 差少少都 ok 既...